Endurheimt með mýkt og meðvitund er 6 vikna námskeið fyrir fólk sem vill styðja við endurheimt sína á hlýjan, markvissan og heildrænan hátt. Námskeiðið er sérstaklega ætlað þeim sem vilja styrkja innri ró, líkamsvitund og traust á eigin getu og. Námskeiðið hentar sérstaklega vel þeim sem eru að ná fótfestu á ný eftir kulnun eða önnur langvinn veikindi og þurfa meiri mýkt, slökun og nærandi endurheimt áður en næstu skref eru stigin.

Á námskeiðinu er unnið með mildar og áhrifaríkar aðferðir sem róa og styrkja líkamann og taugakerfið, styðja við bataferli og hjálpa fólki að finna meira öryggi í eigin líkama og líðan. Þar fléttast saman öndunartækni, jóga, hugleiðsla, djúpslökun, sjálfsmildi og hagnýtar æfingar sem hjálpa þátttakendum að hlusta betur á sjálfa sig, skilja eigin mörk, ná slökun og byggja sig upp með mýkt og meðvitund.

Þetta námskeið snýst ekki um afköst, pressu eða að „koma sér í gang“ með hörku.
Þvert á móti er áherslan á að hægja á, hlusta inn á við og skapa betri grunn fyrir áframhaldið. Markmiðið er að þátttakendur fái tækifæri til að staldra við, draga úr spennu, róa taugakerfið og öðlast aukinn skilning á því hvað þeir þurfa til að byggja sig upp á eigin forsendum.

Í tímum verður meðal annars unnið með:

• öndunaræfingar sem styðja við ró og jafnvægi

• einfaldar jógaæfingar sem næra líkamann

• hugleiðslu og núvitund sem eykur nærveru og innri kyrrð

• yoga nidra djúpslökun sem hjálpar líkama og huga að hvílast á dýpri hátt

• sjálfsmildi og hlýrra innra viðmót

• líkamsvitund og næmni fyrir eigin merkjum

• skýrari tengingu við mörk, orku og þarfir

• mildan undirbúning fyrir næstu skref í daglegu lífi, virkni eða vinnu

Fyrir marga sem hafa upplifað kulnun eða langvinn veikindi getur verið erfitt að treysta sér til þess að fara aftur af stað.
Sumir upplifa að þeir þekki ekki alveg sjálfa sig lengur. Aðrir finna fyrir kvíða, óöryggi eða óþolinmæði gagnvart eigin ferli. Á þessu námskeiði er unnið með þann veruleika af virðingu og skilningi. Þátttakendum er ekki ætlað að „standa sig“, heldur að mæta sér af meiri mýkt, læra að hlusta betur á líkama sinn og finna það sem styður þá raunverulega.